Ang ampalaya (Momordica charantia) o amorgoso ay isa sa mga masustansyang gulay na kapamilya ng Cucurbitae o mga gulay na baging (vine). Ang mga bunga at dahon nito ay kilala sa pagkakaroon ng mapait na lasa dahil sa taglay na momordicin. Ito ay gamot para sa mga taong anemic dahil sa taglay nitong makapagpapadagdag ng dugo sa katawan.
Ang sitaw ay isa sa pinakasikat na gulay dahil maliban sa ito ay masarap o masustansiya, ginagamit ito sa pagpapaganda ng kondisyon ng lupang taniman dahil sa angking kakayahan na ipunin ang nitrohena sa paligid o nitrogen fixation. Ito ay isa sa pinakamura na mapagkukuhanan ng protina. Sagana din sa bitamina A at C, at mineral gaya ng calcium, foliate, phosphorus, at potassium.
Kabilang ang mustasa (Brassica juncea) sa mga dahong gulay. Sa kabila ng kakaibang amoy at lasa nito, ang mustasa ay nagtataglay ng bitamina A, K, calcium, iron, at phosphorus. Maaari itong kainin nang hilaw, binuro o hinahalo sa ulam.
Download: Gabay sa Pagtatanim ng Mustasa
Ang kalabasa (Cucurbita maxima L.) ay kadalasang itinatanim sa bakuran ng bahay at komersyal na lugar dahil sa prutas, talbos, bulaklak, at buto nito. Sa ibang lugar, karaniwang ginagawa ang pagtatanim ng kalabasa sa pagitan ng mga tanim gaya ng mais, tubo, at niyog.
Ang patola (Luffa acutangula) o kabatiti sa Iluko at Ibanag ay mayaman sa phosphorus, calcium at iron. Ang mga lalaking bulaklak ng patola ay nagkukumpo-kumpol samantalang ang mga babaeng bulaklak ay maaaring isahan lamang o kaya ay kasama ng mga lalaking bulaklak.
Ang okra (Hibiscus esculentus L, Abelmoschus esculentus L. Moench) ay kabilang sa pamilya ng Solanaceous. Kilala ito bilang "saluyot a bunga" sa Ilocano at kaluyot sa Ifugao. Isa itong kilala at karaniwang gulay sa merkado. Ang mga bunga nito ay maaaring kaining hilaw, pinakuluan o pinirito. Nagtataglay ang mga buto ng okra ng dekalidad na klase ng langis at protina.
And maintained by ATI RTC 02 Web Team